ინფო

უკან დაბრუნებული აქციზური მარკების მდგომარეობის გამომხატველი გარეგნული ნიშნები სრულად უნდა შეესაბამებოდეს მარკების გაცემისას არსებულ ნიშნებს. უკან დაბრუნებული, გამოუყენებელი აქციზური მარკების შესაძენად გადახდილი ნომინალური ღირებულება დაბრუნებას არ ექვემდებარება. დაბრუნებას არ ექვემდებარება, ასევე, დაზიანებული აქციზური მარკები, შერჩეულ პირთან მიმართვის შემთხვევაში, გამოუყენებელი მატერიალური ფორმის აქციზური მარკების უკან დაბრუნება ხორციელდება შერჩეული პირის მიერ აქციზური მარკების შესწავლისა და შემოსავლების სამსახურისგან მიღებული დასტურის შესაბამისად, როგორც ნაწილობრივი, ასევე, პირველადი შეფუთვების ფორმით. თამბაქოსთვის განკუთვნილი აქციზური მარკების დაბრუნებისას, უკან დაბრუნებული აქციზური მარკების შეფუთვების ფორმები უნდა შეესაბამებოდეს მისი გაცემისას არსებულ ფორმებს, გარდა რულონური ტიპის თვითწებადი მარკებისა. იმპორტიორი ვალდებულია, არააქციზური მარკების მიღებიდან 6 თვიან პერიოდში მოახდინოს მათი გამოყენება/აქტივაცია ან დაბრუნება. 6 თვიანი პერიოდის გასვლის შემდეგ, იმპორტისათვის განკუთვნილი აქციზური მარკები უკან დაბრუნებას არ ექვემდებარება. გაითვალისწინეთ: იმპორტიორების მიერ აქციზური მარკების მიღებიდან 6 თვეში საქონლის იმპორტის განუხორციელებლობის შემთხვევაში აქციზური მარკები ექვემდებარება დაბრუნებას. 6-თვიანი პერიოდის გასვლიდან მეორე დღესვე აქციზური მარკების დაუბრუნებლობა ამ კარის მიზნებისთვის ითვლება აქციზური მარკების სავალდებულო ნიშანდების დაქვემდებარებული საქონლის ქვეყნის შიგნით მიწოდებად და შესაბამისად დაიბეგრება აქციზით, ხოლო შემდგომ პერიოდში, დაუბრუნებელი აქციზური მარკებით ნიშანდებული საქონლის იმპორტისას, მოხდება გადასახდელად დარიცხული აქციზის გადაანგარიშება ფაქტობრივად განხორციელებული იმპორტის ოდენობის პროპორციულად.